བལ་པོའི་ཡུལ་འཁྲུངས་དམ་པའི་རང་རྟགས་གསལ།།
འཁྲུལ་ཞིག་བླ་མས་འཁྲུལ་མེད་ངོས་འཛིན་གནང་།།
གྲོ་མོའི་གྲྭར་ཞུགས་ཐོས་བསམ་སློབ་གཉེར་མཛད།།
ཀུན་བཟང་ཡེ་ཤེས་སྤྲུལ་བར་གསོལ་བ་འདེབས།།
དུས་འགྱུར་རྗེས་སུ་འཕགས་པའི་ཡུལ་དུ་ཕེབས།།
སྦག་སའི་འདུལ་འཛིན་དང་འགྲོགས་གདམ་པ་གསན།།
དཀའ་སྤྱད་སློབ་གཉེར་ཉམས་རྟོགས་ལྷག་ཏུ་འཕེལ།།
བཟོད་པའི་རྒྱན་ཆེན་འཆང་ལ་གསོལ་བ་འདེབས།།
བལ་ཡུལ་ཕེབས་ཏེ་བླ་མ་ཡེ་ཤེས་ལྷན།།
ཕོ་དགོན་བྱང་ཆུབ་ཆོས་ཀྱི་གླིང་ཆེན་དང་།
མོ་དགོན་མཁའ་སྤྱོད་དགའ་བ་འཁྱིལ་བ་བཏབ།།
བསྟན་པའི་གསལ་བྱེད་ཆེན་པོར་གསོལ་བ་འདེབས།།
ནུབ་ཕྱོགས་ཕེབས་ཏེ་ཐེག་ཆེན་ཆོས་ཚོགས་བཏབ།།
ཤར་ནུབ་ཀུན་ཏུ་དེ་ཡི་ཡན་ལག་བཙུགས།།
ལྷག་པའི་བསམ་པས་བསྟན་པ་ཕྱོགས་བཅུར་སྤེལ།།
ཟླ་མེད་འཕྲིན་ལས་དབང་པོར་གསོལ་བ་འདེབས།།
