རྩོམ་གླུ་ཐལ་ཚུབ་མ།

དཔེ་མང་བྲིས་བྲིས་མང་བས་སྨྱུག་ཁ་ཟད་དི།།
བློ་སྣ་གཡེང་གཡེང་མང་བས་ད་ནི་ཆད་འདའ།།
ཤོག་བུ་ཐ་ཞིང་ཡིན་རུང་རྩམ་དོ་བཅུ་ཁ།།
སྨྱུ་གུ་འཇག་རྩྭ་ཡིན་རུང་ཕྱགས་མ་ལོངས་ཚོད།།

གང་བྲིས་གད་སྙིགས་ཡིན་པའི་ཤོག་ཧྲུལ་དེ་ཚོ།།
ཅི་བྲིས་རང་འགྲེལ་དགོས་པའི་ལྐོག་ལབ་འདི་དག །
ཡར་དཀྲུག་མར་འཁོན་རྐྱང་གི་དུག་ཚིག་དེ་ཚོ།།
གནོད་ལས་ཕན་པ་མེད་ཀྱང་དར་སོ་ཆེ་ཨ།།

འབུམ་ཕྲག་པོ་ཏི་ལོངས་པའི་བོད་ཀྱི་མཛོད་ཆེན།།
ཕར་བཤུས་ཚུར་བཤུས་དོར་ན་པོ་ཏི་བརྒྱ་རེད།།
ཡར་འཛེགས་མར་བབས་མང་བའི་རི་ཚོགས་དེ་ཚོ།།
རྒྱབ་མདུན་གང་ལ་སོང་ཡང་གཅིག་འདྲ་ཡིན་པ།།

ཚིག་ལ་རྣོ་དབལ་བཏོན་རུང་དོན་ནི་ཅང་མེད།།
མཐའ་སྐོར་རུ་སྐོར་འབད་ཀྱང་འབབ་ས་སེན་མོ།།
བླ་ཆེན་མི་ཆེན་སྐོང་ནས་གླེང་བརྗོད་བྲིས་ཀྱང་།།
བཟོད་གསོལ་རིང་མོ་ཅན་གྱི་གཏམ་རྒྱུད་རྐྱང་རེད།།

རྒྱ་གར་ཁ་སྤུ་ཅན་ལ་ལོ་སྟོང་བསྟོད་རྗེས།།
བལ་པོ་གསེར་དད་ཅན་ལ་གསོལ་ཁ་གཟབ་རྗེས།།
རྒྱ་ནག་གཏིང་ནག་ཅན་གྱི་ལད་མོ་ཟློས་རྗེས།།
དིང་སང་ནུབ་ཕྱོགས་ཚོ་ལ་ཚད་མར་བརྩིས་ཨ།།

བྲིས་ཀྱི་རྩ་བའི་རྩ་བ་ཁྲག་རྩ་འདི་རེད།།
འདི་ལ་ལད་ཟློས་ཟེར་བ་ཅི་གང་མེད་རེད།།
སྨྱུག་ཁ་རང་སྙིང་བྲལ་བའི་རི་མོ་ཐམས་ཅད།།
ཤོག་བུར་ཆུ་རིས་འབྲི་བའི་སྟོང་གཟུགས་རེད་དོ།།