༡༽ གྲོག་མ་ཁེར་གཤར་གཉིས་གཤར།
ཉིན་གསུམ་སྔོན་གྱི་ཉིན་གུང་ཞིག་ལ། གུས་པ་རང་གི་སྡོད་གནས་ལས་རླངས་འཁོར་སྐར་མ་ཉི་ཤུ་ཙམ་གྱི་བར་ཐག་ཡོད་པའི་ས་ཆ་ཞིག་ཏུ་དབྱིན་ཇིའི་ཨ་མ་ཞིག་གི་སར་མགྲོན་འབོད་ལྟར་ཕྱིན། ཁོ་མོའི་ཁང་པ་དེ་ཧ་ཅང་ཆེན་པོ་ཞིག་དང་། ཕྱི་ནང་གི་བཀོད་པ་ཚང་མ་གཙང་ཞིང་ ཡིད་དུ་འོང་བ་འབའ་ཞིག་ཏུ་འདུག་ན་ཡང་། ཉིན་དེར་གློ་བུར་དུ་གྲོག་མ་མང་པོ་ཞིག་མགྲོན་ཚོམས་སུ་ཁེར་གཤར་གཉིས་གཤར་བྱས་ནས་
ཡོང་གིན་འདུག །མོས་ང་ལ། འདི་ནི་དམིགས་བསལ་ཞིག་རེད། དེ་རིང་ཁྱོད་རང་ངའི་ནང་དུ་ཡོང་གིན་ཡོད་པ་དེ་ཁོང་ཚོས་ཧ་གོ་བ་འདྲ། ཁོང་ཚོའི་རྣ་ལམ་ལ་ཆོས་རེ་འདོན་རོགས་ཀྱིས་ཟེར། ངས་མགྲོན་ཚོམས་ནང་ལོགས་ཀྱི་ཤིང་ཕྲན་བཙུགས་པའི་ཁོག་མ་ཆེ་བ་ཞིག་ལ་འཛུབ་མོ་བཙུགས་ནས། གྲོག་མ་ནང་ལ་ཡོང་བ་དེ་ང་དང་འབྲེལ་བ་ཡོད་པ་ཞིག་མ་རེད། ཁོང་ཚོ་མེ་ཏོག་ཁོག་མ་དེའི་འགྲམ་ལ་འཁྲི་བཞིན་འདུག ། ཅིག་བྱས་ན་དེར་བརླན་གཤེར་གྱི་སྔོ་ངད་དང་ཟས་གྱི་དྲི་སོགས་གང་རུང་ཞིག་ཡོད་ས་རེད། ཁོག་མ་འདི་ཕྱི་ལོགས་སུ་སྤོས་ན་གྲོག་མ་དག་ཀྱང་རང་བཞིན་གྱི་ཕྱི་ལོགས་སུ་གཤར་འགྲོ་ངེས་རེད་ཅེས་བཤད། མོས་མེ་ཏོག་འདི་ཡུན་རིང་པོར་གཏན་འཇགས་སུ་བཞག་ཡོད་ཀྱང་དེ་རིང་མ་གཏོགས་གྲོག་མ་འཁོར་མ་སོང་ཟེར། ངས་དེར་ལན་དུ། ཅིག་བྱས་ན་མེ་ཏོག་ལ་ཆུ་བླུགས་ས་ནས་ཟས་རིགས་དང་མངར་ཆ་དེ་འདྲ་ཁོག་མའི་ནང་དུ་སོང་ཡོད་པའང་སྲིད་ཅེས་ལབ། གང་ལྟར་མཚམས་མཚམས་གྲུང་པོར་བརྩི་བའི་མགོ་སེར་དག་ཀྱང་ང་ཚོ་ལས་ཀྱང་སྣང་ཚུལ་ལས་འདས་པའི་ཆོས་ཉིད་ལ་སྤྲོ་སྣང་དང་རེ་དོགས་ཆེ་བ་འདུག །
དེ་མུར་ངའི་བསམ་བློའང་འདུག་སྟེགས་དེའི་ཕྱོགས་སུ་ཤོར། ནགས་ཀྱི་མཐོངས་ཡངས་པོ་འདིར་འབྱོར་མཁན་མང་པོ་ཞིག་ང་ནང་བཞིན་ངལ་སྟེགས་འདིའི་ཐོག་དུ་བསྡད་ནས་མདུན་ལྗོངས་ཀྱི་རི་ངོགས་སུ་ལྟད་མོ་ལྟ་ངེས། བག་ཡངས་ཀྱི་སེམས་པ་རྒྱ་ཡན་དུ་ཀློད་པས་ཚད་གཞི་མ་འདྲ་བའི་རང་སེམས་ཀྱི་ངལ་གསོ་འབྱོངས་སྲིད། ཞར་དང་ཞོར་ལ། བྱས་པ་དྲིན་དུ་བཟོ་བའི་བུ་ཕྲུག་ཡ་རབས་ཤིག་གིས་རང་གི་ཨ་མ་ལ་བཅངས་པའི་བརྩེ་བའི་དན་རྟགས་འདིའང་སེམས་ལ་འཁོར་སྲིད། རྟེན་འབྱུང་གི་འབྲེལ་བ་ལུ་གུ་བརྒྱུད་ཀྱི་སྣེ་མོ་དེ་ནས་སྐྱེ་བོ་གཞན་དང་གཞན་དག་གི་མ་བུའི་བར་གྱི་བརྩེ་བའི་རིན་ཐང་དྲན་པའི་སྐུལ་མའང་བྱེད་སྲིད།
