ཁྱེད་གཉིས་འཛོམས་པ་དགའ་སོང་།

-ལམ།

ལས་ལ་བསྐོས་པའི་སྤྲིན་པ་དཀར་པོ།།

སེམས་ལ་བབས་པའི་མེ་ཏོག་ཡིན་པས།།

ཆར་དང་ཟིལ་བའི་འདབས་མ་རེ་རེ།།

སྙིང་གི་གཏིང་ལ་ག་ལེར་ཐིགས་ཡོང་།།

ཞེ་ལ་ཐོགས་པའི་ཆུ་མིག་དྭངས་མོ།།

ཡིད་ཀྱི་ངོགས་ལས་དལ་བུར་རྒྱུ་བས།།

དྲན་པ་རྡོ་ཡི་རི་མོའི་འོད་མདངས།།

ད་དུང་ཉམས་མེད་རྟིང་ལ་སྦས་ཡོད།།

རྒྱུད་ལ་འཁྲོལ་བའི་དབྱངས་རྟ་སྙན་མོ།།

མགྲིན་ལ་ལྷུང་བའི་སྙིང་གཏམ་ཡིན་པས།།

ཡིད་ལ་མ་བརྗེད་དམ་པོར་ཆོངས་དང་།།

དུས་ལ་འཕྲད་པའི་ལས་ཤིག་ཡོད་འགྲོ།།

མཚོ་ལ་བབས་པའི་ཉི་མའི་འོད་མདངས།།

སྙིང་ལ་འཐིམ་པའི་འཛུམ་ཆུང་ཡིན་པས།།

ལོ་ལ་བསྟར་བའི་ཞེ་འདང་སོམས་དང་།།

སླད་མར་འཛོམས་པའི་ལས་ཤིག་ཡོད་འགྲོ།།

སྨག་ལ་བགྲོད་པའི་ཟླ་འོད་ཆུང་ཆུང་།།

སེམས་ལ་སྒྲོན་པའི་བརྩེ་དུང་ཡིན་པས།།

གང་ལ་འཕྲད་ཀྱང་གཅེས་པར་སྐྱོངས་དང་།།

ལས་ལ་བསྐོས་པའི་ལམ་ཞིག་ཡོད་འགྲོ།།