མེ་ཏོག་འཆར་ཐེངས་མང་ན་སྐམ་ཐེངས་མང་།

ལོ་ཟླའི་ཆུ་མོ་ཤར་ནས་ནུབ་ཏུ་བཞུད།།
དྲན་པའི་རླུང་བུ་ཕྱོགས་མཚམས་ཀུན་ནས་ལྡང་།།
ཁྱེད་དང་བྲལ་བ་བཟང་ཞེས་ང་ཡིས་བཤད།།
ཡང་བསྐྱར་མཇལ་བའི་ཉི་མ་འཆར་ངེས་རེད།།

མི་ཚེ་དཀའ་ཞེས་ཆང་རག་ཧུབ་འགའ་བཏུང་།།
བརྩེ་དུང་ཟབ་ཅེས་ནན་པའི་ཚིག་འགའ་བརྐོས།།
ཚེ་སྔོན་བརླགས་པའི་གཡུ་ཆུང་གྲུ་དམར་ཁྱེད།།
ཤིང་ལོ་ལྗང་ཁུ་འདི་རང་ཡིན་ན་ཨང་།།

ལྷན་དུ་ཁྲུས་ལ་རོལ་སའི་གཙང་པོ་དེ།།
ཆེ་རུ་སོང་དོན་མིག་ཆུས་མིན་ནམ་སྙམ།།
མདའ་ཤོང་མདུང་ཤོང་ཕོ་རབ་སྙིང་གི་ཞིང་།།
མི་འདོད་རྩྭ་ཡན་དག་གིས་ལྷབ་ལྷབ་གཡོ།།

ཚེ་ནི་ཐུང་ཡང་དྲན་འོས་བརྗེད་འོས་མང་།།
འཚོ་བ་དུབ་རུང་དགའ་འོས་དགོད་འོས་མཆིས།།
སྒང་གཤོང་མང་པོ་མང་པོ་འགྲིམས་པའི་མཐར།།
ཁྱེད་ཀྱི་པང་དུ་ཐུན་གཅིག་ཉལ་སྙིང་བྲོ།།

དང་པོ་ཐུག་ནས་ད་ལྟའི་དུས་འདིའི་བར།།
ཁྱེད་ཀྱི་དོད་དུ་སུ་ཡང་བཞག་པ་མེད།།
བསྔས་མགོ་བརླན་པའི་རྨི་ལམ་འདི་དང་དེ།།
མཚན་གྱི་ཐོག་མཐར་ལ་ཁའི་དར་ལྕོག་བཞིན།།

ཁྲུང་ཁྲུང་ཁྱུ་དང་བྲལ་བ་ང་ཡིན་ན།།
ངང་པ་རྙི་ལ་ཐེབས་པ་ཁྱེད་རང་རེད།
བྱམས་པ་སྙིང་ལ་ཉལ་བའི་ངའི་གླིང་བུ།།
གོ་མཁན་ཤིན་ཏུ་མང་ཡང་རྟོགས་མཁན་དཀོན།།

ནམ་ཟླ་མི་ཚེ་བཞིན་དུ་འགྱུར་བཞིན་འགྲོ།།
མེ་ཏོག་འཆར་ཐེངས་མང་ན་སྐམ་ཐེངས་མང་།།
བརྩེ་བའི་རི་བོ་སྔར་བཞིན་བརྟན་པ་འདི།།
ཤ་བ་ཕོ་མོ་དག་གིས་བརྩེན་ས་བྱེད།།